رویندر جڈیجہ بھی ٹی ٹونٹی انٹرنیشنل کرکٹ سے سبکدوش

ٹی ٹوئنٹی ورلڈکپ۔2024 کا ٹائٹل جیتنے کے بعد تجربہ کار بلے باز ویراٹ کوہلی، کپتان روہت شرما کے بعد آل رونڈر رویندر جڈیجہ نے بھی نے ٹی ٹوئنٹی انٹرنیشنل سے ریٹائرمنٹ کا اعلان کردیا۔ جڈیجہ نے اتوار کو انسٹاگرام پر پوسٹ کیا اور ٹی ٹوئنٹی انٹرنیشنل کرکٹ سے ریٹائرمنٹ کے کی اطلاع دی ۔ جڈیجہ طویل عرصے تک ہندوستانی ٹیم کیلئے کھیلتے رہے۔ ان کے کیریر میں بھی ورلڈکپ کی کمی تھی اور جڈیجہ نے اس بار اس خلا کو پر کیا۔

رویندر جڈیجہ کوہلی اور روہت کی طرح ونڈے اور ٹسٹ کھیلنا جاری رکھیں گے اور ان کی شاندار کارکردگی آئی پی ایل میں بھی نظر آئے گی۔ جڈیجہ نے سوشل میڈیا، انسٹاگرام پر لکھاکہ شکر سے بھرے دل کے ساتھ میں ٹی ٹوئنٹی انٹرنیشنل کو الوداع کہہ رہا ہوں۔ میں نے ہمیشہ اپنے ملک کیلئے بہترین دینے کی کوشش کی ہے اور دوسرے فارمیٹس میں بھی ایسا ہی کرنے کی کوشش کروں گا۔

انہوں نے کہاکہ ٹی ٹوئنٹی ورلڈ جیتنا میرا خواب تھا۔ جڈیجہ اس موقع پر ساتھی کھلاڑیوں‘ بورڈ اور کوچ کا شکریہ ادا کیا۔ واضح رہے کہ جڈیجہ کا شمار ٹیم انڈیا کے بہترین فیلڈروں میں ہوتاہے۔ جڈیجہ نے اپنے کیریر میں 74 ٹی 20 انٹرنیشنل میچ کھیلے۔ ان میچوں میں انہوں نے اپنے بیاٹ سے 515 رنز بنائے اور 54 وکٹیں حاصل کیں۔انہوں نے 2009 میں سری لنکا کے خلاف ٹی ٹوئنٹی کیریر کا آغاز کیاتھا۔

ٹی20 ورلڈکپ۔2024 میں جڈیجہ کی کارکردگی کچھ خاص نہیں رہی۔ انہوں نے صرف ایک وکٹ حاصل کی اور صرف 35 رنز بنائے۔